09/10/2026
1. 提起Elon Musk，大家都淨係諗到Space X、Tesla，但佢母親Maye Musk都來頭唔細。上個禮拜六，我喺保誠講座度聽Maye Musk分享，個題目係《超越成就：領導力、抗逆力與傳承》。佢78歲，氣勢非凡，完全冇老態龍鐘嘅感覺，呢個真係一個天賦。人生最貴嘅未必係錢，而係身體仍然有精力試新嘢嘅時間。
2. Maye成日講自己由細到大接受嘅教育，其實就係學識獨立同適應變化。由細細個參與家庭冒險旅程，到後來搬去唔同國家生活，佢一路都相信一件事——人生冇預設劇本，遇到挑戰就學習適應，再繼續向前行。呢種精神亦貫穿佢成個人生。由營養師、模特兒，到後來成為全球知名作家同公眾人物，佢不斷喺唔同人生階段重新出發，亦正正證明適應力同學習能力，往往比規劃一條完美道路更重要。
3. 呢個優點亦傳咗落去佢嘅下一代。Maye係一位非凡嘅母親，除咗Elon，佢二仔Kimbal做餐廳、做無人機表演，喺梵蒂岡同FIFA都做過；女兒Tosca做時裝、拍愛情電影，Maye會陪佢行紅地氈，一門三傑。
4. 當有人問Tosca佢阿媽點湊大佢同兩個阿哥，佢嘅統一回答都係「阿媽成日都返工」，即係冇時間湊。Maye就話：「佢哋全部都有自己嘅才能，我由得佢哋自由發展。」簡單一句，其實講緊一種好深層嘅信任。佢仲話：「其實我哋屋企冇咩規矩……我一直由得佢哋做自己想做嘅事，就算失敗咗都唔緊要，可以再試第二樣。無論點樣，屋企永遠都係佢哋嘅避風港。」
5. 呢個真係對於香港家長嘅暮鼓晨鐘，你以為intensive咁照顧子女，出盡銀彈畀佢哋學習，谷到佢滿分先係皇道？Maye就話畀你聽其實路真係有好多條，soft skills有時反而更關鍵，例如強大嘅獨立能力。
6. 其中一個經典係Elon Musk同佢同住時，個仔成晚冇瞓，喺度設計火箭。作為阿媽，可以做嘅，就係關心阿仔，問佢一句：「咁你要唔要啲炒蛋做早餐？」呢個亦係SpaceX成立前嘅故事。家長識得放手，其實仔女真係可以大放異彩。如果係香港嘅家長，可能會叫你：「唉，搵份正職啦，唔好發夢喇。」
7. 聽完Maye分享點樣培養仔女，其實自然會令人諗到另一個問題：「作為父母，究竟應該留啲咩畀下一代？」主持人當日亦有問同場嘅保誠大中華區CEO Angel：「亞洲家庭喺傳承規劃上，最容易被忽略嘅係咩？」佢就話，除咗遺產規劃，好多人冇諗過價值觀同「生存技能」嘅傳承，世界變得太快，你要敏捷，你要適應，先可以喺未來立足。所以都明點解保誠搞咗個 PruNextGen平台出嚟，同名牌學院合作，畀啲細路去學soft skills。
8. 我自己幾認同呢個觀點。所謂傳承，更重要係佢哋成為一個點樣嘅人。主持人當日亦問咗一條好有趣嘅問題：「喺一個AI幾乎可以做到任何嘢嘅世界，邊種人類特質會令下一代領袖更具優勢？」Maye話，依家AI已經改名做SI（super intelligence），咩都做到。科技點樣演變，冇人知道；但可以肯定嘅係，未來永遠屬於願意學習、敢於適應嘅人。
9. 講座嘅最後，保誠送咗一幅定制書法藝術作品畀Maye，將佢人生嘅旅程比作梅花，象徵即使身處寒冬，依然堅韌綻放。而Maye自己，從15歲開始被質疑「模特兒生涯到18歲就完」，一路做到70歲，做CoverGirl最年長代言人，74歲登上《Sports Illustrated》泳裝封面，真正用行動證明，人生最重要嘅唔係永遠順境，而係擁有面對變化嘅勇氣，同持續成長嘅能力。而呢份能力，或者正正係我哋最值得傳承畀下一代嘅「財富」。
