04/08/2025
Caddaalad-darro Joogto Ah: Cabashada Shacabka Hawd & Reserved Area ee Ismaamulka Soomaalida Itoobiya
By: Abdikariim Kaariye
August 2025
Deegaanka Hawd & Reserved Area ee ku yaalla xadka Itoobiya iyo Somaliland waa mid kamid ah dhulka ugu ballaaran ee uu degan yahay bulshada Soomaaliyeed ee gobolka, balse wuxuu si weyn u wajahayaa takoorka maamul, dhaqaale, iyo amni. Shacabka deegaankaas ayaa muddo sanado ah bixiyay canshuur aad u badan iyagoo aan waxba ka helin dib ugu noqoshada canshuurtaas oo loogu beddelo adeegyo bulsho sida waddooyin, caafimaad, waxbarasho ama maamulka deegaanka.
Canshuur la bixiyaa, horumar lama helo
Shacabka deegaanka ayaa sheegay in canshuurta laga qaado sanad kasta ay si joogto ah u kororto – iyadoo sanadka 2023 halkii beer laga qaaday 1500 birr, sanadka 2024 laga qaaday 2500 birr, halka sanadkan 2025 la gaarsiiyay 3900 birr. Tani waxay muujinaysaa in saddexdii sano ee la soo dhaafay ay canshuurtu korortay in ka badan 100%, iyadoo aan wax adeeg ah loo helin.
Maamul la'aan iyo xuquuqda la duudsiyay
Inkasta oo deegaanka Hawd & Reserved Area uu leeyahay dhul aad u weyn oo baaxad ahaan ka weyn gobollo iyo degmooyin badan oo ka tirsan Ismaamulka Soomaalida, wali laba degmo oo keliya ayaa laga sameeyay halkaas. Waxaa si isdaba joog ah loo arkaa in deegaamada kale – gaar ahaan kuwa ay degan yihiin beelo gaar ah – si joogto ah loo magacaabo gobollo iyo degmooyin, halka deegaanka Hawd la iska dayacay.
Lacag shacabka laga ururiyay oo la lunsaday
Dhibaatooyinka kale ee cabashooyinka lagu sheegay waxaa kamid ah lacag gaadhaysa 10 milyan oo birr oo laga ururiyay qabalayada Harta Sheekh, Wera Bejiro iyo Allaybadey si waddo loogu dhiso. Lacagtaas kadibna wax waddo ah lagama fulin, shacabka laftigiisa oo cod dheer ku dalbaday isla xisaabtan ayaa la caburiyay, iyadoo qofkii hadla la xiro ama la cabsi geliyo.
Eex ciidan iyo caburinta shacabka
Ciidanka Liyuu Police ayaa lagu eedeeyay in si cad ay u garab istaagaan beelo gaar ah – iyadoo hub loo siiyo ama dagaal beeleed la garab galo. Waxaa sidoo kale dhacday in dad rayid ah guryahooda laga raro si xoog ah loona dejiyo beelo kale, taas oo sii hurisay isku dhacyada bulshada. Shacabka deegaanka ayaa sheegaya in xaaladdu tahay mid sii xumaanaysa oo u baahan xal degdeg ah.
Baaq shacabka
Shacabka deegaanka Hawd & Reserved Area waxay si cad u sheegayaan:
In aanay sii aqbalayn dulmiga iyo takoorka maamulka;
In ay xaq u leeyihiin adeegyo la mid ah kuwa deegaamada kale ee Ismaamulka Soomaalida;
In aanay bixin doonin canshuur haddii aan waxba laga qaban deegaanka;
In ay xaq u leeyihiin inay is difaacaan haddii ciidamo lagu caburiyo shacabka.
Gabagabo
Cabashada shacabka Hawd & Reserved Area waa mid dhab ah oo ku salaysan xaqiiqooyin caddaan ah – canshuur la bixiyo, adeeg la’aan, maamul la’aan, iyo cadaalad darro dhinac kasta ah. Waxaa waajib ah in la dhageysto codkooda, loo sameeyo degmooyin iyo adeegyo bulsho, laguna beddelo nidaamka hadda jira ee cadaalad darrada ah.
