06/09/2026
*لو معاك ٢ مليون جنيه، هتشتري بيهم شقة وتأجرها ب ٥ آلاف جنيها شهريا، ولا نحطهم في البنك وتاخد فوائد ٢٠ ألف شهريا؟!*
-------------------------------------------
السؤال -من ناحية اقتصادية بحتة بعيدا عن الجدل الفقهي حول حرمة فوائد البنوك من حلها- شكله سهل وبسيط، بس في الحقيقة الموضوع مش مجرد ٥ آلاف و٢٠ ألف، الموضوع أكبر وأعقد من كده بكتير..
يعني الإجابة مش في ال٥ آلاف ولا ال٢٠ ألف.
فخيار شراء الشقة وتأجيرها ممكن يكون أكثر فائدة اقتصادية من فوائد البنوك رغم أن عائد الإيجار يساوي ربع قيمة الفوائد تقريبا.
ازاي ده؟!
- قيمة الشقة نفسها في زيادة مستمرة
- فالشقة التي قيمتها السوقية ٢ مليون اليوم، ممكن تكون بعد سنة او اثنين أو أكثر أو أقل ٣ ملايين، وعمليا مفيش عقار جيد قيمته بتقل، إلا نادرا ولظروف خاصة.
- أما المبلغ اللي في البنك مش هيزيد، يعني قيمته الاسمية ثابتة، فال٢ مليون جنيها، مش هيكون ٣ ملايين ولو بعد ألف سنة، إلا لو صاحبه ادخر جزء من الفائدة أو كلها.
- ولو زادت نسبة التضخم بشكل مفاجئ أو تدهورت قيمة العملة بشكل كبير، زي اللي حصل في السنين اللي فاتت، فممكن تكون قيمة الشقة أضعاف قيمتها الحالية، لكن ال٢ مليون جنيه المودعة في البنك هتبقى كما هي بقيمتها الاسمية، وصاحبها هيلاقي نفسه مش قادر يشتري بها نفس الشقة التي كانت معروضة علبه سابقا ولو زود على المبلغ من عنده.
يعني دلوقتي عندك اختيارين:
- بنك = عائد شهري مرتفع، مع احتمال قوي جدا لتآكل القوة الشرائية بشكل كبير.
- شقة= عائد شهري منخفض لكنه قابل للزيادة خلال السنوات المقبلة، مع احتمال قوي جدا لتحقيق ربح رأسمالي مجزي، على المدى الطويل.
لو راجعنا تطور أسعار العقارات خلال السنين الماضية هنلاقي الزيادة كبيرة وأحيانا تزيد عن نسبة التضخم ومع قلة المعروض من العقارات وارتفاع أسعار الأراضي المخصصة للبناء ومحدوديتها مقارنة بالطلب والزيادة السكانية، هنقدر نقول إن الربح الرأسمالي للشقة هيكون مجزي بشكل كبير.
وهنا نسأل، هل الفكرة في ال٥ آلاف ولا ال٢٠ ألف؟! ولا الفكرة في العائد الكلي والقيمة الحقيقية للأصل اللي معايا؟
بس ليه نحصر نفسنا في الخيارين دول بس، ليه نحط البيض كله في سلة واحدة؟!
لو بتدور على استثمار، طبق الحكمة اللي بتقول لا تضع البيض كله في سلة واحدة، ودي نبقى نتكلم عنها في وقت تاني.
