06/04/2026
إحنا عايشين في زمن "الغباء العابر للقارات.
حكاية "كسر العظام" اللي دايرة دلوقتي بين طهران وواشنطن.. حكاية تخليك تضحك وأنت مرعوب، زي اللي بيتفرج على فيلم رعب وكوميديا سوداء في وقت واحد.
إيه اللي بيحصل في "المولد" ده؟
البرتقالي ترامب خبط على الطاولة، وقال "خلاص يا جدعان الصبر نفد"، ونزل رزع في محطات الكهرباء ومنشآت الطاقة في إيران. يعني بالبلدي كده عايز "يضلمها" عليهم تماماً ويقطع عنهم الميّة والنور.. بس الغريب إن الجماعة هناك بيقولوا "أهون ألف مرة إنك تدخّل فيل في خرم إبرة من إنك تهز شعرة في النظام ده". ثبات انفعالي يخليك تشك في قواك العقلية!
سبوبة "مضيق هرمز": إيران قلبت "فتوة حارة" رسمي.. قالت لأي سفينة شايلة علم دولة معادية "ممنوع اللمس أو الاقتراب". وبمنتهى الصياعة، راحت لدول الخليج وقالتلهم: "بيننا وبينكم عيش وملح واتفاقيات ثنائية، سفنكم تعدي بسلام.. أما الجماعة بتوع واشنطن وتل أبيب، فأي برميل نفط رايح ليهم هنحرقه في قلب الناقلة". نظام "أبوها راضي وأنا راضي.. وأنت يا ترامب مش عايزينك قاضي".
الحلفاء.. "يا واخد القرد على ماله":
روسيا: واقفة بتصور وتراقب، بس مش راضية تديهم الـ S-400.. ليه يا عم "بوتين"؟ قالك الإيرانيين دول "عفاريت" في الهندسة العكسية، لو شموا ريحة الجهاز هيفككوه ويعملوا منه نسخة محلي وينافسوا الروس في السوق. "خوف من الشطارة مش أكتر!".
الصين: دي بقى "الداهية" اللي قاعدة بتلعب شطرنج. رفضت تديهم دفاعات ليزرية تقعّد الطيارات الأمريكية في الأرض، مش خوفاً على أمريكا، لأ.. ده خوفاً من إن أمريكا لما "تتلطم" جوياً هتتجنن وترمي "قنابل قذرة" تمسح أحياء كاملة من على الخريطة.
ترامب في "خناقة" لوحده: الراجل حواليه استقالات بالكوم، والديمقراطيين مستنيين له غلطة عشان "يشلفطوه" في الكونجرس. اكتشف إن إسقاط نظام "هرمي" زي إيران أصعب بكتير من أفلام "رامبو" اللي هو مصدقها. الجنود اللي باعتهم دول ينفعوا في "خطف" أو "إنقاذ"، لكن "احتلال" دولة فيها 90 مليون بني آدم؟ دي محتاجة أكفان أكتر ما محتاجة رصاص!
الخلاصة المُرّة:
إحنا في عالم مبيحترمش غير اللي في إيده "نبوت". الصين قاعدة بتتعلم من "صمود" إيران، وبتقول لنفسها: "إذا كان دول عملوا كده في أمريكا، أنا هعمل فيهم إيه؟!
